ਸਭ ਤੋਂ ਵੱਧ ਰੌਲ਼ਾ ਅਕਾਲੀਆਂ ਦੇ ਰਾਜ ਵਿਚ ਰੇਤ ਮਾਫੀਆ ਤੇ ਚਿੱਟੇ ਦੇ ਨਸ਼ੇ ਦਾ ਪਿਆ। ਸ਼ਰੋਮਣੀ ਅਕਾਲੀ ਦਲ ਬਾਦਲ ਨੇ ਪੰਜਾਬ ਲਈ ਕੁਝ ਕਰਨਾ ਸੀ ਪਰ ਇਹ ਆਪਣਾ ਵਪਾਰ ਵਧਾਉਣ ਵਿੱਚ ਲੱਗ ਗਏ।। ਅਜੇਹੇ ਸਮੇਂ ਵੀ ਆਏ ਜਦੋਂ ਬਾਦਲ ਦੀ ਕੇਂਦਰ ਵਿਚ ਪੂਰੀ ਤੂਤੀ ਬੋਲਦੀ ਸੀ ਪਰ ਬਾਦਲ ਨੇ ਸੀਨੀਅਰ ਅਕਾਲੀਆਂ ਨੂੰ ਦਰ-ਕਿਨਾਰ ਕਰਕੇ ਆਪਣੀ ਨੂੰਹ ਨੂੰ ਵਜ਼ੀਰੀ ਲੈ ਦਿੱਤੀ।
ਸੀਨੀਅਰ ਅਕਾਲੀਆਂ ਨਾਲੋਂ ਹਰਸਿਮਰਤ ਕੌਰ ਸਭ ਤੋਂ ਛੋਟੀ ਉਮਰ ਦੀ ਸੀ। ਬੀਬਾ ਹਰਸਿਮਰਤ ਕੌਰ ਦੀ ਪੰਥ ਤੇ ਪੰਜਾਬ ਪ੍ਰਤੀ ਕੋਈ ਕੁਰਬਾਨੀ ਨਹੀਂ ਤੇ ਨਾ ਹੀ ਉਸ ਨੂੰ ਕੋਈ ਤਜਰਬਾ ਸੀ।
1984 ਉਪਰੰਤ ਵਾਪਰੀਆਂ ਘਟਨਾਵਾਂ, ਜ਼ੁਲਮ ਕਰਨ ਵਾਲੇ ਪੁਲਸੀਆਂ ਨੂੰ ਸਜਾਵਾਂ, ਬੇ-ਕਸੂਰ ਨੌਜਵਾਨਾਂ ਦੇ ਕਤਲਾਂ ਦੀ ਪੜਤਾਲ, ਧਰਮੀ ਫੌਜੀਆਂ ਦੇ ਮੁੜ ਵਸੇਬੇ ਲਈ, ਸਿੱਖ ਰੈਫ੍ਰੈਂਸ ਲਾਇਬ੍ਰੇਰੀ ਦੀਆਂ ਪੁਸਤਕਾਂ ਆਦਿ ਸਬੰਧੀ ਅਕਾਲੀਆਂ ਕਦੇ ਕੋਈ ਗੱਲ ਨਹੀਂ ਕੀਤੀ। ਓਲਟਾ ਅਕਾਲੀ ਦਲ ਨੇ ਆਪਣਾ ਮੁਖ ਦਫਤਰ ਅੰਮ੍ਰਿਤਸਰ ਤੋਂ ਬਦਲ ਕੇ ਚੰਡੀਗੜ੍ਹ ਬਣਾ ਲਿਆ। ਅਜੇਹੇ ਵਰਤਾਰੇ ਵਿਚ ਅਕਾਲੀ ਦਲ ਬਾਦਲ ਨੇ ਪੂਰੀ ਤਰ੍ਹਾਂ ਪੰਥ ਵਲੋਂ ਪਿੱਠ ਮੋੜ ਲਈ। ਰਹਿੰਦੀ ਕਸਰ ਬਾਦਲ ਪੰਥਕ ਸਰੋਕਾਰਾਂ ਨੂੰ ਰੋਲਦਿਆਂ ਵੋਟਾਂ ਲੈਣ ਲਈ ਸੌਦਾ ਸਾਧ ਦੇ ਪੈਰਾਂ ਵਿੱਚ ਜਾ ਬੈਠਾ। ਬਾਦਲ ਨੇ ਏੱਥੇ ਬੱਸ ਨਹੀਂ ਕੀਤੀ, ਸੌਧਾ ਸਾਧ ਨੂੰ ਬਿਨਾਂ ਮੰਗਿਆਂ ਮੁਆਫੀ ਦਿੱਤੀ ਤੇ ਸ਼੍ਰੌਮਣੀ ਕਮੇਟੀ ਕੋਲੋਂ 90 ਲੱਖ ਦੇ ਇਸ਼ਤਿਹਾਰ ਦੇਣੇ ਦੇ ਕੇ ਆਪਣੀ ਅਕਲ ਦਾ ਜਲੂਸ ਕੱਢਿਆ।
ਪਿਉ ਮੁਖ ਮੰਤਰੀ ਪੁਤ ਗ੍ਰਹਿ ਮੰਤਰੀ ਹੋਵੇ ਤੇ ਇਨ੍ਹਾਂ ਦੇ ਰਾਜ ਵਿੱਚ ਗੁਰੂ ਗ੍ਰੰਥ ਸਾਹਿਬ ਦੀ ਗਿਣ ਮਿਥ ਕੇ ਬੇਅਦਬੀ ਹੋਵੇ ਪਰ ਬਾਦਲ ਸਰਕਾਰ ਨੇ ਕੋਈ ਕਾਰਵਾਈ ਨਹੀਂ ਕੀਤੀ, ਉਲਟਾ ਸਿੱਖ ਨੌਜਵਾਨਾਂ ‘ਤੇ ਹੀ ਨਜਾਇਜ਼ ਪਰਚੇ ਬਣਾ ਧਰੇ। ਏਦੂੰ ਵੱਧ ਹੋਰ ਬੇ-ਸ਼ਰਮੀ ਕਿਹੜੀ ਹੋ ਸਕਦੀ ਹੈ। ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਤੁਹਾਡੇ ਰਾਜ ਵਿਚ ਹੋਈ ਹੈ ਤੁਹਾਡੇ ਲਈ ਡੁਬ ਕੇ ਮਰਨ ਵਾਲੀ ਗੱਲ ਸੀ।
ਕੇਂਦਰ ਵਿੱਚ ਡਾ. ਮਨਮੋਹਨ ਸਿੰਘ ਦੀ ਦੋ ਵਾਰ ਰਲ਼ੀ ਮਿਲ਼ੀ ਸਰਕਾਰ ਬਣੀ। ਅੰਨਾ ਹਜ਼ਾਰੇ ਨੂੰ ਚੇਤਾ ਆ ਗਿਆ ਕਿ ਮੈਂ ਵੀ ਆਪਣੇ ਬਾਰੇ ਲੋਕਾਂ ਨੂੰ ਕੁਝ ਦੱਸ ਦਿਆਂ। ਡਾ. ਮਨਮੋਹਨ ਸਿੰਘ ਦੀ ਸਰਕਾਰ ਨੂੰ ਲੀਹ ਤੋਂ ਲਾਹੁੰਣ ਲਈ ਸਮਾਜ ਸੇਵੀ ਅੰਨਾ ਹਜ਼ਾਰੇ ਨੇ ਜਨ ਲੋਕਪਾਲ ਬਿੱਲ ਲਿਆਉਣ ਲਈ ਅਗਸਤ 2011 ਨੂੰ ਦਿੱਲੀ ਵਿਚ ਅੰਦੋਲਨ ਸ਼ੁਰੂ ਕੀਤਾ। ਲਗ-ਪਗ ਬਹੁਤ ਸਾਰੀਆਂ ਪਾਰਟੀਆਂ ਸਮਰੱਥਨ ਵਿਚ ਆ ਗਈਆਂ। ਭਾਰਤੀ ਜਨਤਾ ਪਾਰਟੀ ਨੇ ਇਸ ਅੰਦੋਲਨ ਨੂੰ ਆਪਣੇ ਹੱਕ ਵਿਚ ਭੁਗਤਾਅ ਲਿਆ। ਅੰਨਾ ਹਜ਼ਾਰੇ ਦੇ ਅੰਦੋਲਨ ਚੋਂ ਕੇਜਰੀਵਾਲ ਪੈਦਾ ਹੋਇਆ। ਉਸ ਨੇ ਆਮ ਪਾਰਟੀ ਦੀ ਨੀਂਹ ਰੱਖੀ। ਆਮ ਪਾਰਟੀ ਵਿਚ ਬਹੁਤ ਹੀ ਦਾਨਸ਼ਵਰ, ਸੁਹਿਰਦ ਤੇ ਕੁਝ ਕਰਨ ਦੀ ਆਸ ਨਾਲ ਲੋਕ ਸ਼ਾਮਿਲ ਹੋਏ।
ਦਿੱਲੀ ਵਿਚ ਕੇਜਰੀਵਾਲ ਨੇ ਹੂੰਝਾ ਫੇਰਵੀਂ ਜਿੱਤ ਹਾਸਲ ਕਰਕੇ ਬੁਲੰਦੀ ਦੇ ਝੰਡੇ ਗੱਡ ਦਿੱਤੇ। ਦਿੱਲੀ ਵਾਸੀਆਂ ਨੇ ਕੇਜਰੀਵਾਲ ਦੇ ਸ਼ਬਦੀ ਜਾਲ ਨੂੰ ਤਰਜੀਹ ਦਿੱਤੀ। ਹੁਣ ਕੇਜਰੀਵਾਲ ਨੇ ਪੰਜਾਬ ਵਲ ਨੂੰ ਮੂੰਹ ਕਰ ਲਿਆ। ਪੰਜਾਬ ਦੇ ਲੋਕਾਂ ਨੇ ਦੋ ਰਵੈਤੀ ਪਾਰਟੀਆਂ ਨੂੰ ਬੁਰੀ ਤਰ੍ਹਾਂ ਹਰਾ ਦਿੱਤਾ। ਕੇਜਰੀਵਾਲ ਦੇ ਧੂੰਆਂਧਾਰ ਲੈਕਚਰ ਤੇ ਭਗਵੰਤ ਸਿੰਘ ਮਾਨ ਦੇ ਚੁਟਕਲਿਆਂ ਨੇ ਪੰਜਾਬ ਦੀ ਰਾਜਨੀਤੀ ਨੂੰ ਪੂਰੀ ਤਰ੍ਹਾਂ ਪ੍ਰਭਾਵਤ ਕੀਤਾ। ਪੰਜਾਬ ਦੇ ਲੋਕਾਂ ਨੂੰ ਭਾਵੇਂ ਆਮ ਪਾਰਟੀ ਸਬੰਧੀ ਕੋਈ ਬਹੁਤਾ ਭੁਲੇਖਾ ਨਹੀਂ ਸੀ ਫਿਰ ਵੀ ਆਪਣੇ ਸੂਬੇ ਦੀ ਕਿਸਮਤ ਅਜਮਾਉਣ ਲਈ ਰਵਾਇਤੀ ਪਾਰਟੀਆਂ ਨੂੰ ਖੂੰਝੇ ਲਾਉਂਦਿਆਂ 92 ਐਮ. ਐਲ. ਏ. ਜਿਤਾ ਦਿੱਤੇ ਤੇ ਪੰਜਾਬ ਦੇ ਰਾਜ ਭਾਗ ਦੀ ਡੋਰ ਆਮ ਪਾਰਟੀ ਨੂੰ ਫੜਾ ਦਿੱਤੀ। ਆਮ ਆਦਮੀ ਪਾਰਟੀ ਨੂੰ ਪਾਰਲੀਮੈਂਟ ਵਿਚ ਕੁਝ ਸੀਟਾਂ ਮਿਲੀਆਂ। ਆਮ ਆਦਮੀ ਪਾਰਟੀ ਦਾ ਭਾਂਡਾ ਛੋਟਾ ਸੀ ਪਰ ਦਾਣੇ ਬਹੁਤੇ ਪੈ ਗਏ। ਆਮ ਆਦਮੀ ਪਾਰਟੀ ਪੰਜਾਬ ਵਿਚ ਸਰਕਾਰ ਤਾਂ ਬਣਾ ਗਈ ਹੈ ਪਰ ਅਜੇ ਤਕ ਡਾਵਾਂ ਡੋਲ ਹੀ ਫਿਰ ਰਹੀ ਹੈ।
ਪੰਜਾਬ ਦੇ ਮੁਖ ਮੰਤਰੀ ਦੀ ਭਗਵੰਤ ਸਿੰਘ ਮਾਨ ਨੇ ਸੁੰਹ ਚੁਕ ਲਈ ਪਰ ਵਾਗਡੋਰ ਸਾਰੀ ਆਮ ਆਦਮੀ ਪਾਰਟੀ ਨੇ ਆਪਣੇ ਹੱਥ ਰੱਖੀ। ਅਜ਼ਾਦਾਨਾ ਤੌਰ ‘ਤੇ ਕੰਮ ਨਹੀਂ ਕਰਨ ਦਿੱਤਾ। ਮੁਖ ਮੰਤਰੀ ਦੇ ਨਾਲ ਦਿੱਲੀ ਤੋਂ ਆਏ ਪਾਰਟੀ ਕਾਰਕੁੰਨਾਂ ਨੂੰ ਬਹੁਤ ਸਾਰੀਆਂ ਤਾਕਤਾਂ ਦੇ ਕੇ ਸਰਕਾਰੀ ਕੰਟਰੋਲ ਉਨ੍ਹਾਂ ਨੂੰ ਦੇ ਦਿੱਤਾ। ਪੰਜਾਬ ਦੇ ਮੁਖ ਮੰਤਰੀ ਦੂਜਿਆਂ ਸੂਬਿਆਂ ਵਿੱਚ ਪਾਰਟੀ ਦੀ ਚੋਣ ਲੜਨ ਲਈ ਜ਼ਿਆਦਾ ਸਮਾਂ ਦੇਣ ਲੱਗ ਪਏ। ਸਟੇਜ ਤੇ ਧਮਾਕੇਦਾਰ ਭਾਸ਼ਨ ਦੇਣਾ ਹੋਰ ਹੈ ਪਰ ਸੂਬੇ ਲਈ ਬਰੀਕ ਰਾਜਨੀਤੀ ਦੀ ਸੂਝ ਹੋਣਾ ਹੋਰ ਹੈ। ਨਿਰਸੰਦੇਹ ਭਗਵੰਤ ਸਿੰਘ ਮਾਨ ਦੀ ਨਿਯਤ ‘ਤੇ ਕੋਈ ਸ਼ੱਕ ਨਹੀਂ ਕੀਤਾ ਜਾ ਸਕਦਾ ਹੈ ਪਰ ਉਨ੍ਹਾਂ ਦੇ ਕੰਮ ਕਰਨ ਦੀ ਸ਼ੈਲੀ ਆਮ ਲੋਕਾਂ ਨੂੰ ਪ੍ਰਭਾਵਤ ਨਹੀਂ ਕਰ ਸਕੀ।
ਕੇਜਰੀਵਾਲ ਤੇ ਭਗਵੰਤ ਸਿੰਘ ਮਾਨ ਦਾ ਰੁਖ ਦੇਖ ਕੇ ਬਹੁਤ ਸਾਰੇ ਨੇਤਾ ਆਪ ਹੀ ਪਾਰਟੀ ਨੂੰ ਛੱਡ ਗਏ ਜਾਂ ਉਨ੍ਹਾਂ ਨੂੰ ਕੱਢ ਦਿੱਤਾ। ਆਮ ਪਾਰਟੀ ਦਾ ਢਾਂਚਾ ਤਾਂ ਜ਼ਰੂਰ ਖੜਾ ਹੋ ਗਿਆ ਪਰ ਤਾਕਤ ਸਾਰੀ ਆਮ ਪਾਰਟੀ ਦੇ ਸੁਪਰੀਮੋ ਨੇ ਆਪਣੇ ਹੱਥ ਵਿਚ ਹੀ ਰੱਖੀ। ਆਮ ਪਾਰਟੀ ਨੇ ਪੰਜਾਬ ਦੇ ਵਿਕਾਸ ਲਈ ਕੋਈ ਠੋਸ ਨੀਤੀ ਨਹੀਂ ਬਣਾਈ। ਆਮ ਪਾਰਟੀ ਦੇ ਆਗੂਆਂ ਨੂੰ ਪੰਜਾਬ ਦੇ ਸਭਿਆਚਾਰ ਤੇ ਸਰੋਕਾਰਾਂ ਦੀ ਵੀ ਸੂਝ ਨਹੀਂ ਹੈ। ਪੰਜਾਬ ਵੱਸਦਾ ਗੁਰਾਂ ਦੇ ਨਾਂ ‘ਤੇ ਅਮੁਲੇ ਸਿਧਾਂਤ ਨੂੰ ਤਿਲਾਂਜਲੀ ਦੇ ਕੇ ਆਪਣਾ ਨਵਾਂ ਫੋਟੋਆਂ ਦਾ ਸਭਿਆਚਾਰ ਘੜ ਲਿਆ। ਇਹ ਸਭਿਆਚਾਰ ਥੋੜੀਆਂ ਵੋਟਾਂ ਤਾਂ ਲੈ ਕੇ ਦੇ ਸਕਦਾ ਹੈ ਪਰ ਪੰਜਾਬ ਦੀ ਰੂਹ ਤੋਂ ਕੋਹਾਂ ਦੂਰ ਹੈ। ਪੰਜਾਬ ਦੇ ਲੋਕ ਗੁਰੂਆਂ ਦੀ ਰੂਹ ਨਾਲ ਜੁੜੇ ਹੋਏ ਹਨ।
ਸੁਖਬੀਰ ਸਿੰਘ ਬਾਦਲ ਵਲੋਂ ਬਣਾਏ ਸੁਖ ਵਿਲਾਸ ਦੀ ਜਾਂਚ ਪੜਤਾਲ ਕਰਾਉਣ ਦੀ ਥਾਂ ‘ਤੇ ਜਾਂ ਕੇਸ ਦਰਜ ਕਰਨ ਤੋਂ ਪਹਿਲਾਂ ਹੀ ਧੂਆਂਧਾਰ ਬਿਆਨ ਦੇਣੇ, ਚੰਗੇ ਤਾਂ ਲਗਦੇ ਹਨ ਪਰ ਠੋਸ ਨਤੀਜੇ ਨਹੀਂ ਨਿਕਲਦੇ। ਅਜੇਹੇ ਕਾਹਲੀ ਵਿੱਚ ਦਿੱਤੇ ਬਿਆਨਾਂ ਨਾਲ ਸਥਿੱਤੀ ਹਾਸੋਹੀਣੀ ਬਣ ਗਈ ਹੈ। ਪੰਜਾਬ ਸਰਕਾਰ ਦੀ ਹੁਣ ਤਕ ਦੀ ਕਾਰਗੁਜ਼ਾਰੀ ਪੰਜਾਬੀਆਂ ਨੂੰ ਪ੍ਰਭਾਵਤ ਨਹੀਂ ਕਰ ਸਕੀ। ਮਹੱਲਾ ਕਲੀਨਕ ਬਣਾਉਣ ਦੀ ਥਾਂ ‘ਤੇ ਚੱਲ ਰਹੀਆਂ ਸਰਕਾਰੀ ਡਿਸਪੈਂਸਰੀਆਂ ਨੂੰ ਅਪਡੇਟ ਕਰ ਦੇਣਾ ਚਾਹੀਦਾ ਸੀ। ਭਗਵੰਤ ਸਿੰਘ ਮਾਨ ਦੀ ਸਰਕਾਰ ਵਲੋਂ ਜਿਹੜੇ ਫੈਸਲੇ ਕੀਤੇ ਜਾਂਦੇ ਰਹੇ ਉਹ ਮੁੜ ਵਾਪਸ ਲੈਣੇ ਪਏ। ਤਿੰਨ ਸੌਂ ਯੂਨਿਟ ਬਿਜਲੀ ਸਭ ਨੂੰ ਫਰੀ ਦੇਣੀ ਪੰਜਾਬ ਦੀ ਆਰਥਿਕਤਾ ਦਾ ਲੱਕ ਤੋੜਨ ਦੇ ਬਰਾਬਰ ਹੈ। ਇਹ ਸਹੂਲਤ ਤਾਂ ਕਿਸੇ ਨੇ ਮੰਗੀ ਹੀ ਨਹੀਂ ਸੀ।
ਹੁਣ ਪਾਰਟੀ ਵਲੋਂ ਆਪਣੇ ਨਿਗਦੇ ਅਫ਼ਸਰਾਂ ਨੂੰ ਪੰਜਾਬ ਦੀ ਵਾਗਡੋਰ ਸੰਭਾਲ ਦੇਣੀ, ਚਰਚਾ ਦਾ ਵਿਸ਼ਾ ਬਣੇ ਹੋਏ ਹਨ। ਬਹੁਤ ਸਾਰੇ ਵਿਜੀਲੈਂਸ ਨੇ ਕੇਸ ਦਰਜ ਕੀਤੇ ਪਰ ਉਨ੍ਹਾਂ ਨੂੰ ਕਦੋਂ ਬੂਰ ਪਏਗਾ ਕੁਝ ਕਿਹਾ ਨਹੀਂ ਜਾ ਸਕਦਾ? ਚੋਣਾਂ ਤੋਂ ਪਹਿਲਾਂ ਆਮ ਆਦਮੀ ਪਾਰਟੀ ਨੇ ਵਾਅਦਾ ਕੀਤਾ ਸੀ ਕਿ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਕਰਨ ਵਾਲਿਆਂ ਨੂੰ ਪੂਰੀ ਤਰ੍ਹਾਂ ਨੰਗਿਆ ਕੀਤਾ ਜਾਏਗਾ। ਇਸ ਸਬੰਧੀ ਕੁੰਵਰ ਵਿਜੇ ਪਰਤਾਪ ਸਿੰਘ ਵਿਧਾਨ ਸਭਾ ਵਿਚ ਸਮਾਂ ਮੰਗਦਾ ਆ ਰਿਹਾ ਹੈ ਉਸ ਨੂੰ ਹੁਣ ਤਕ ਬੇਅਦਬੀ ਮੁਆਮਲਿਆਂ ਸਬੰਧੀ ਬੋਲਣ ਦਾ ਸਮਾਂ ਹੀ ਨਹੀਂ ਮਿਲ ਸਕਿਆ। ਹੁਣ ਤਾਂ ਸੁਪਰੀਮ ਕੋਰਟ ਵਿਚੋਂ ਵੀ ਸੌਦਾ ਸਾਧ ਤੇ ਕੇਸ ਚਲਾਉਣ ਦੀ ਆਗਿਆ ਮਿਲ ਗਈ ਹੈ ਦੇਖੋ ਊਠ ਕਿਸ ਕਰਵੱਟ ਬੈਠਦਾ ਹੈ।
ਪੰਜਾਬ ਦੀ ਵਰਤਮਾਨ ਸਥਿੱਤੀ ਸਬੰਧੀ ਸ੍ਰ ਸੁਖਦੇਵ ਸਿੰਘ ਪਤਰਕਾਰ ਦੀ ਟਿੱਪਣੀ ਬੜੀ ਸਾਰਥਿਕ ਹੈ—
ਪ੍ਰਧਾਨ ਮੰਤਰੀ ਵਜੋਂ ਇੰਦਰਾ ਗਾਂਧੀ ਪੰਜਾਬ (ਅਤੇ ਹੋਰਨਾਂ ਸਟੇਟਾਂ) ਦੇ ਵਿਧਾਨਿਕ ਅਧਿਕਾਰ ਰੱਜ ਕੇ ਹਥਿਆਉਂਦੀ ਰਹਿੰਦੀ ਸੀ ਕਿਸੇ ਵੀ ਵਿਸ਼ੇ ਬਾਰੇ ਦਿੱਲੀ ਵਿੱਚ ਮੀਟਿੰਗ ਹੁੰਦੀ ਫਲਸਰੂਪ ਸੂਬਿਆਂ ਦੀ ਕੁਝ ਨਾ ਕੁਝ ਤਾਕਤ ਕੁਤਰਦੀ ਰਹਿੰਦੀ ਸੀ। ਪਰ ਉਹ ਸਭ ਕੁਝ ਇੱਕ ਤਰੀਕੇ, ਸਲੀਕੇ, ਵਿਧੀ ਰਾਹੀਂ ਕਰਦੀ ਸੀ। ਆਪਣੇ ਕਿਸੇ ਮੁਖ ਮੰਤਰੀ ਦੀ ਜਨਤਕ ਤੌਰ ‘ਤੇ ਖੇਹ ਨਹੀਂ ਉਡਾਉਂਦੀ ਸੀ। ਪਰ ਕੇਜਰੀਵਾਲ ਜੀ ਦਾ ਬਾਬਾ ਆਦਮ ਨਿਰਾਲਾ ਹੈ। ਪੰਜਾਬ ਦੇ ਦਿਨ-ਪ੍ਰਤੀ-ਦਿਨ ਦੇ ਰਾਜ ਪ੍ਰਬੰਧ ਕਾਰੋਬਾਰ ਵਿੱਚ ਜਿੰਨਾ ਦਖਲ ਆਮ ਆਦਮੀ ਪਾਰਟੀ ਦੇ ਇਸ ਸੁਪਰੀਮੋ ਦਾ ਹੈ ਇੰਨਾ ਅੱਜ ਤੱਕ 75 ਸਾਲਾਂ ਵਿੱਚ ਨਹੀਂ ਵੇਖਿਆ ਗਿਆ। ਇੰਝ ਲਗਦਾ ਹੈ ਕਿ ਹਰਿਆਣੇ ਦੀਆਂ ਸ਼ਰਮਨਾਕ ਹਾਰਾਂ ਪਿੱਛੋਂ ਤਾਂ ਬਿਲਕੁਲ ਹਫਲ ਗਿਆ ਹੈ। ਕੇਜਰੀਵਾਲ ਨੇ ਮੁਖ ਮੰਤਰੀ ਦੇ ਦਫਤਰ ਅੰਦਰ ਰਿਮੋਟ ਕੰਟਰੋਲ ਰਾਹੀਂ, ਇੱਕ ਢੰਗ ਨਾਲ ਖਰੂਦ ਮਚਾ ਰੱਖਿਆ ਹੈ। ਭਗਵੰਤ ਸਿੰਘ ਮਾਨ ਦੇ ਚਾਰ ਸੀਨੀਅਰ ਵਿਸ਼ਵਾਸ ਪਾਤਰ ਅਫ਼ਸਰਾਂ ਨੂੰ ਜਿਸ ਕੋਝੇ ਢੰਗ ਨਾਲ ਕੱਢਿਆ ਗਿਆ ਉਸ ਤਰ੍ਹਾਂ ਕਿਸੇ ਘਰ ਦੀ ਸੁਆਣੀ ਆਪਣੀ ਝਾੜੂ ਪੋਚਾ ਦੇਣ ਵਾਲੀ ਨੂੰ ਵੀ ਨਹੀਂ ਕੱਢਦੀ। ਪਤੰਦਰ ਕੇਜਰੀਵਾਲ ਨੇ ਹੱਦ ਹੀ ਮੁਕਾ ਦਿੱਤੀ ਹੈ।
ਭਗਵੰਤ ਸਿੰਘ ਮਾਨ ਦੇ ਦਫ਼ਤਰ ਵਿੱਚ ਸਭ ਤੋਂ ਅਹਿਮ ਪੁਜ਼ੀਸ਼ਨ ਤੇ ਆਪਣਾ ਇੱਕ ਪਾਲਤੂ ਬਾਉਂਸਰ ਬਿਠਾ ਦਿੱਤਾ ਜਿਸ ਤੋਂ ਉਸ ਨੇ ਆਪਣੀ ਹੀ ਪਾਰਟੀ ਦੀ ਔਰਤ ਰਾਜ ਸਭਾ ਮੈਂਬਰ ਉੱਪਰ ਕੁਟਾਪਾ ਚੜਵਾਇਆ ਸੀ। ਅਤੇ ਜਿਸ ਉਪਰ ਫੌਜਦਾਰੀ ਕੇਸ ਚੱਲ ਰਿਹਾ ਹੈ ਅਤੇ ਜੋ ਇਸ ਵੇਲੇ ਜ਼ਮਾਨਤ ਤੇ ਹੈ। ਇਹ ਬਾਉਂਸਰ ਹੁਣ ਚੀਫ਼ ਮਨਿਸਟਰ ਦੇ ਪ੍ਰਿਸੀਪਲ ਸਕੱਤਰ ਤਕ ਨੂੰ ਅੱਖਾਂ ਵਿਖਾਵੇਗਾ। ਤਾਨਾ ਸ਼ਾਹੀ ਇਸ ਹੱਦ ਤਕ ਚਲੀ ਗਈ ਕਿ ਰਾਤੋ ਰਾਤ ਕੇ. ਏ. ਪੀ. ਸਿਨਹਾ ਨਾਂ ਦਾ ਇੱਕ ਨਵਾਂ ਨਕੋਰ ਚੀਫ਼ ਸੈਕਟਰੀ ਬਿਠਾ ਦਿੱਤਾ। ਵਰਤਮਾਨ ਮੁਖ ਸਕੱਤਰ ਅਨੁਰਾਗ ਵਰਮਾ ਨੂੰ ਮੱਖਣ ਵਿੱਚੋਂ ਵਾਲ਼ ਵਾਂਙ ਬਾਹਰ ਕੱਢ ਮਾਰਿਆ। ਭਗਵੰਤ ਸਿੰਘ ਮਾਨ ਮੁਖ ਮੰਤਰੀ ਵਜੋਂ ਇਸ ਵਰਤਾਰੇ ਨੂੰ ਕਿਵੇਂ ਵੇਖਦਾ ਹੋਵੇਗਾ? ਕੀ ਉਸ ਨੂੰ ਕੋਈ ਹੇਠੀ ਮਹਿਸੂਸ ਨਹੀਂ ਹੋ ਰਹੀ? ਕੀ ਉਹ ਸ਼ਰਮਸਾਰ ਨਹੀਂ ਹੋ ਰਿਹਾ? ਕੀ ਉਹ ਇਸੇ ਤਨਖਾਹ ‘ਤੇ ਕੰਮ ਕਰਦਾ ਰਹੇਗਾ?
ਇਤਿਹਾਸ ਦੇ ਇਸ ਨਵੇਂ ਅਧਿਆਏ ਦੀ ਗੱਲ ਕਰਦਿਆਂ ਮੈਂ ਹੈਰਾਨ ਪਰੇਸ਼ਾਨ ਹਾਂ। ਪੰਜਾਬ ਨੇ ਆਪਣੀ ਅਜੇਹੀ ਦੁਰਦਸ਼ਾ 1849 ਤੋਂ ਇਲਾਵਾ ਪਹਿਲਾਂ ਜਾਂ ਬਾਅਦ ਵਿੱਚ ਸ਼ਾਇਦ ਕਦੇ ਦੇਖੀ ਵੀ ਨਾ ਹੋਵੇ”।
ਸਾਡਾ ਮੱਥਾ ਤਾਂ ਓਦੋਂ ਹੀ ਠਣਕ ਗਿਆ ਸੀ ਜਦੋਂ ਰਾਜ ਸਭਾ ਦੇ ਮੈਂਬਰ ਬਣਾਉਣ ਸਮੇਂ ਉਨ੍ਹਾਂ ਲੋਕਾਂ ਨੂੰ ਰਾਜ ਸਭਾ ਵਿਚ ਭੇਜ ਦਿੱਤਾ ਜਿੰਨ੍ਹਾਂ ਨੂੰ ਪੰਜਾਬ ਦੇ ਹਿੱਤਾਂ ਦੀ ਕੋਈ ਜਾਣਕਾਰੀ ਨਹੀਂ ਹੈ। 92 ਐਮ. ਐਲ. ਏ ਮਨਿਸਟਰਾਂ ਜਾਂ ਆਮ ਪਾਰਟੀ ਦੇ ਕਿਸੇ ਕਾਰਕੁੰਨ ਨੇ ਕਦੇ ਵੀ ਪੰਜਾਬ ਦੇ ਹਿੱਤਾਂ ਦੀ ਗੱਲ ਨਹੀਂ ਕੀਤੀ। ਹਾਲਤ ਏਦਾਂ ਦੇ ਪੈਦਾ ਹੋ ਗਏ ਹਨ ਕਿ ਭਗਵੰਤ ਸਿੰਘ ਮਾਨ ਹਸਪਤਾਲ ਵਿਚ ਦਾਖਲ ਹੋਇਆ ਕੋਈ ਪਤਾ ਲੈਣ ਵੀ ਨਹੀਂ ਗਿਆ।
ਭਾਰਤੀ ਜਨਤਾ ਪਾਰਟੀ ਵਿਚ ਇਸ ਵੇਲੇ ਬਹੁਤੇ ਲੀਡਰ ਦੂਜੀਆਂ ਪਾਰਟੀਆਂ ਵਿਚੋਂ ਗਏ ਹਨ। ਜੇ ਕੋਈ ਪੰਜਾਬ ਦਾ ਦਰਦ ਰੱਖਦਾ ਹੈ ਤਾਂ ਜਨਤਾ ਪਾਰਟੀ ਵਿਚ ਰਹਿੰਦਿਆਂ ਕੋਈ ਪੰਜਾਬ ਲਈ ਪੈਕਜ ਲੈ ਲਓ ਨਹੀਂ ਤਾਂ ਇਤਿਹਾਸ ਤੂਹਾਨੂੰ ਵੀ ਮੁਆਫ਼ ਨਹੀਂ ਕਰੇਗਾ। ਪੰਜਾਬ ਦੇ ਮੁਦਿਆਂ ਲਈ ਸਾਰੀਆਂ ਪਾਰਟੀਆਂ ਨੂੰ ਆਪਣੇ ਵਖਰੇਵੇਂ ਛੱਡ ਕੇ ਪੰਜਾਬ ਨਾਲ ਜੁੜੇ ਮੁਦਿਆਂ ਦੀ ਗੱਲ ਕਰਨੀ ਚਾਹੀਦੀ ਹੈ। ਇਕ ਦੂਜੇ ਤੇ ਦੂਸ਼ਣਬਾਜ਼ੀ ਚੁਟਕਲਿਆਂ ਰਾਹੀਂ ਲਾਉਣੀ ਬੜੀ ਚੰਗੀ ਲਗਦੀ ਹੈ, ਪਰ ਇਹ ਪੰਜਾਬ ਦਾ ਕੁਝ ਵੀ ਸਵਾਰ ਨਹੀਂ ਸਕਦੀ।
ਇਕ ਚਾਕ ਹੋ ਤੋ ਸੀਂ ਲੂੰ, ਹਮਦਮ ਗਿਰੇਬਾਂ ਆਪਨਾ,
ਜ਼ਾਲਮ ਨੇ ਫਾੜ ਡਾਲਾ ਹੈ ਯਿਹ ਤਾਰ ਤਾਰ ਕਰ ਕੇ।
ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਸ਼ਾਂਤੀ, ਪਿਆਰ, ਭਰਾਤਰੀ ਭਾਵ ਅਤੇ ਆਤਮਿਕ ਜੀਵਨ ਦੇਣ ਦਾ ਸੁਨੇਹਾ ਸੰਸਾਰ ਤਕ ਪਹੁੰਚਾਉਣਾ ਜ਼ਰੂਰੀ ਹੈ ਤਾਂ ਜੋ ਇਸ ਐਟਮੀ ਯੁਗ ਵਿਚ ਸ਼ਾਂਤੀ ਭਰਿਆ ਜੀਵਨ ਸੰਸਾਰ ਮਾਣ ਸਕੇ। ਇਸ ਦੀ ਪੂਰਤੀ ਲਈ 1996 ਵਿਚ ਗੁਰਮਤਿ ਗਿਆਨ (ਚੈਰੀਟੇਬਲ) ਟਰੱਸਟ ਕਾਇਮ ਕੀਤਾ ਗਿਆ ਹੈ।
Punjabi
English