ਸਿੱਖ ਸੰਸਥਾਵਾਂ ਨੂੰ ਬਦਨਾਮ ਕਰਨ ਵਾਲੀ ਵਿਚਾਰ ਵੀ ਕਰ ਲੈਣ ਵਿਚ ਕੋਈ ਹਰਜ ਨਹੀਂ। ਜੱਥੇਦਾਰ ਜੀ ਜਦੋਂ ਸੰਸਥਾ ਗਲਤ ਫੈਸਲੇ ਲਏਗੀ ਤਾਂ ਓਦੋਂ ਉਂਗਲ਼ਾਂ ਉਠਣਗੀਆਂ। ਕੀ ਸਿੰਘ ਸਾਹਿਬਾਨ ਤੇ ਚੰਡੀਗੜ੍ਹ ਜਾ ਕੇ ਸੌਦਾ ਸਾਧ ਦੀ ਮੁਆਫੀ ਦੀ ਇਬਾਰਤ ਲਿਖਣ ਦਾ ਦੋਸ਼ ਨਹੀਂ ਲੱਗ ਰਿਹਾ। ਕੀ ਸ਼੍ਰੋਮਣੀ ਕਮੇਟੀ ਦੀ ਬੌਧਿਕ ਜ਼ਿੰਮੇਵਾਰੀ ਨਹੀਂ ਬਣਦੀ ਸੀ ਕਿ ਕਮੇਟੀ ਬਦਨਾਮ ਹੋ ਜਾਏਗੀ? ਓਦੋਂ ਤਾਂ ਕੇਵਲ ਵੋਟਾਂ ਦੀ ਖਾਤਰ ਜਾਂ ਬਾਦਲ ਪਰਵਾਰ ਨੂੰ ਬਚਾਉਣ ਲਈ ਸਿੱਖਾਂ ਦੀ ਸਿਰਮੋਰ ਸੰਸਥਾ ਦਾ ੯੨ ਲੱਖ ਸੰਗਤ ਦੀ ਚੜ੍ਹਤ ਵਿਚੋਂ ਇਸ ਕੰਮ ਲਈ ਲੱਗ ਗਿਆ ਕਿ ਸੌਦਾ ਸਾਧ ਤਾਂ ਬਹੁਤ ਧਰਮੀ ਪੁਰਸ਼ ਹੈ? ਕੀ ਸਾਡੀ ਸੰਸਥਾ ਇਸ ਦਿਨ ਨੀਵੇਂ ਤਲ ‘ਤੇ ਨਹੀਂ ਆ ਗਈ ਸੀ। ਜੱਥੇਦਾਰ ਜੋਗਿੰਦਰ ਸਿੰਘ ਵੇਦਾਂਤੀ ਨੇ ਜੱਥੇਦਾਰ ਬਣਨ ਉਪਰੰਤ ਸ਼੍ਰੋਮਣੀ ਕਮੇਟੀ ਨੂੰ ਇਕ ਪੱਤਰ ਲਿਖਿਆ ਸੀ ਕਿ ਅਕਾਲ ਤੱਖਤ ਦੇ ਜੱਥੇਦਾਰ ਨੂੰ ਜੱਥੇਦਾਰ ਥਾਪਣ ਲਈ ਤੇ ਅਹੁਦੇ ਤੋਂ ਉਤਾਰਨ ਲਈ ਕੋਈ ਵਿਧੀ ਵਿਧਾਨ ਜ਼ਰੂਰ ਹੋਣਾ ਚਾਹੀਦਾ ਹੈ। ਅਜੇ ਤਕ ਸ਼੍ਰੋਮਣੀ ਕਮੇਟੀ ਨੇ ਅਜੇਹੇ ਸਵਾਲ ਵਲ ਕਦੇ ਤਵੱਜੋਂ ਦਿੱਤੀ? ਅਕਾਲ ਤੱਖਤ ਦੇ ਜੱਥੇਦਾਰ ਜੋਗਿੰਦਰ ਸਿੰਘ ਵੇਦਾਂਤੀ ਸਾਧ ਧਨਵੰਤ ਸਿੰਘ ਨੂੰ ਬਲਾਤਕਾਰ ਦੇ ਕੇਸ ਵਿਚ ਕਲੀਨ ਚਿੱਟ ਦਿੰਦੇ ਹਨ ਜਦ ਕਿ ਕੋਰਟ ਏਸੇ ਸਬੰਧ ਵਿਚ ਬਾ-ਮਸ਼ੱਕਤ ਸਜਾ ਸਣਾਉਂਦੀ ਹੈ, ਦੱਸੋ ਸਿੱਖ ਸੰਸਥਾ ਨੂੰ ਕੌਣ ਬਦਨਾਮ ਕਰ ਰਿਹਾ ਹੈ? ਸਿੱਖ ਸੰਸਥਾਵਾਂ ਨੂੰ ਬਦਨਾਮ ਕਰਨ ਵਾਲੇ ਕਾਰਨਾਮੇ ਤੁਸੀਂ ਖ਼ੁਦ ਕਰੀ ਜਾ ਰਹੇ, ਦੋਸ਼ ਦੂਜਿਆਂ ਸਿਰ ਮੜ੍ਹ ਰਹੇ ਹੋ, ਹੈ ਨਾ ਜੱਗੋਂ ਤੇਰ੍ਹਵੀਂ। ਜੱਥੇਦਾਰ ਜੀ ਚੇਤਾ ਕਰੋ! ਤੁਸੀਂ ਖੁਦ ਸ਼੍ਰੋਮਣੀ ਕਮੇਟੀ ਨੂੰ ਪੱਤਰ ਲਿਖਿਆ ਹੈ ਕਿ ਦਰਬਾਰ ਸਾਹਿਬ ਤੋਂ ਹੁੰਦੇ ਪ੍ਰਸਾਰਣ ਸਬੰਧੀ ਕੋਈ ਠੋਸ ਨੀਤੀ ਬਣਾਈ ਜਾਏ, ਕਮੇਟੀ ਆਪਣਾ ਚੈਨਲ ਆਪ ਬਣਾਵੇ, ਕੀ ਸਿੱਖ ਸੰਸਥਾ ਨੇ ਅਮਲ ਕਰ ਲਿਆ ਹੈ? ਸ਼੍ਰੋਮਣੀ ਕਮੇਟੀ ਦੇ ਪ੍ਰਬੰਧ ਹੇਠ ੩੨੮ ਪਾਵਨ ਸਰੂਪ ਕਿੱਥੇ? ਕੀ ਕੋਈ ਜ਼ਿੰਮੇਵਾਰੀ ਤਹਿ ਕੀਤੀ ਗਈ ਹੈ? ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਵੱਡੇ ਬਾਦਲ ਨੂੰ ਫ਼ਖਰ-ਏ-ਕੌਮ ਦਾ ਸਨਮਾਨ ਦਿੱਤਾ ਗਿਆ ਹੈ। ਜ਼ਰਾ ਦੱਸੋਗੇ ਕਿ ਬਾਦਲ ਨੂੰ ਇਹ ਸਨਮਾਨ ਕਿਉਂ ਦਿੱਤਾ ਗਿਆ। ਬਾਦਲ ਨੇ ਕੌਮ ਲਈ ਜਾਂ ਧਰਮ ਪਰਚਾਰ ਦੇ ਖੇਤਰ ਵਿਚ ਕੀ ਯੋਗਦਾਨ ਪਾਇਆ ਹੈ? ਗੁਰੂ ਨਾਨਕ ਯੂਨੀਵਰਸਟੀ ਵਿਚ ਬਾਬਾ ਰਾਮ ਸਿੰਘ ਨਾਮਧਾਰੀ ਦੇ ਨਾਂ ‘ਤੇ ਸਤਿਗੁਰ ਰਾਮ ਸਿੰਘ ਚੇਅਰ ਸਥਾਪਿਤ ਕਰਕੇ ਗੁਰੁ ਸਾਹਿਬ ਦੀ ਬਰਾਬਰੀ ਨਹੀਂ ਕਰਾਈ?