ਲਗਦਾ ਨਹੀਂ ਵੱਖਰੇ ਹੋਏ ਅਕਾਲੀਏ ਕੁਝ ਪੰਥ ਜਾਂ ਪੰਜਾਬ ਦਾ ਸਵਾਰ ਸਕਣ ਕਿਉਂਕਿ ਇਨ੍ਹਾਂ ਸਾਰਿਆਂ ਨੇ 2027 ਦੀਆਂ ਚੋਣਾਂ ਵਿਚ ਇਕੱਠੇ ਹੋ ਜਾਣਾ ਹੈ ਤੇ ਪੈਣਾ ਵੀ ਇਨ੍ਹਾਂ ਸਾਰਿਆਂ ਭਾਜਪਾ ਦੀ ਝੋਲ਼ੀ ਵਿਚ ਹੈ। ਅਗਾਂਹ ਭਾਜਪਾ ਨੂੰ ਸੀਟਾਂ ਵੀ ਇਹ ਅੱਧੀਆਂ ਛੱਡਣ ਲਈ ਰਾਜ਼ੀ ਹੋ ਜਾਣਗੇ। ਇਨ੍ਹਾਂ ਸਾਰਿਆਂ ਦੇ ਖ਼ੂਨ ਵਿਚ ਪੰਥਕ ਜਜ਼ਬਾ ਹੀ ਨਹੀਂ ਹੈ। ਬਾਗੀ ਅਕਾਲੀਏ ਵੀ ਪਰਵਾਰਵਾਦ ਤੇ ਸਤਾ ਦੇ ਨਸ਼ੇ ਦੀ ਭੇਟ ਚੜ੍ਹ ਗਏ ਹਨ। ਇਹ ਗੁਰਦੁਆਰਿਆਂ ਦੇ ਸਭਿਆਚਾਰ ਨੂੰ ਛੱਡ ਕੇ ਹੋਟਲਾਂ ਦੇ ਸਭਿਆਚਾਰ ਦਾ ਸ਼ਿਕਾਰ ਹੋ ਕੇ ਰਹਿ ਗਏ ਹਨ। ਕਬੱਡੀ ਮੈਚਾਂ ਵਿਚ ਫਿਲਮੀ ਬੀਬੀਆਂ ਦੇ ਠੁੰਮਕਿਆਂ ਦੀ ਲੋੜ ਨਹੀਂ ਸੀ। ਪਰ ਅਕਾਲੀਏ ਪੰਥਕ ਰਾਵਇਤਾਂ ਨੂੰ ਭੁੱਲ ਕੇ ਇਹ ਠੁੰਮਕੇ ਵੀ ਦੇਖਦੇ ਰਹੇ। ਹੁਣ ਕਿਹੜੇ ਮੂੰਹ ਨਾਲ ਅਕਾਲੀ ਦਲ ਬਚਾਓ ਦਾ ਰਾਗ ਅਲਾਪ ਰਹੇ ਹਨ। ਅਕਾਲੀ ਦਲ ਬਾਦਲ ਬਿੱਖਰ ਗਿਆ। ਅਜੇ ਦੋ ਟੋਟੇ ਹੀ ਹੋਣੇ ਸਪੱਸ਼ਟ ਹੋਏ ਹਨ ਪਰ ਲੱਗਦਾ ਤੀਜਾ ਵੀ ਬਹੁਤ ਜਲਦ ਧੜਾ ਬਣੇਗਾ। ਸਿਰਫ ਤਿੰਨ ਚਾਰ ਅਕਾਲੀ ਲੀਡਰ ਛੱਡ ਦਿਓ ਬਾਕੀ ਸਾਰੇ ਥਾਲੀ ਦੇ ਬੈਂਗਣ ਹਨ। ਅਕਾਲੀ ਦਲ ਵਿਚੋਂ ਪੰਥਕ ਪ੍ਰੰਪਰਾਵਾਂ, ਲੋਕਰਾਜੀ ਢਾਂਚਾ, ਸਿੱਖੀ ਵਾਲਾ ਜਜ਼ਬਾ ਤੇ ਗੁਰਮਤਿ ਵਾਲਾ ਵਿਧੀ ਵਿਧਾਨ ਸਭ ਕੁਝ ਖਤਮ ਹੋ ਚੁੱਕਿਆ ਹੈ।

ਤਤਕਾਲੀ ਪ੍ਰਧਾਨ ਮੰਤ੍ਰੀ ਸ੍ਰੀਮਤੀ ਇੰਦਰਾ ਗਾਂਧੀ ਨੇ ਮੁਲਕ ਵਿਚ ਐਮਰਜੈਂਸੀ ਲਗਾਈ ਤਾਂ ਸਭ ਤੋਂ ਪਹਿਲਾਂ ਅਕਾਲੀ ਦਲ ਨੇ ਮਨੁੱਖੀ ਅਧਿਕਾਰਾਂ ਦੇ ਹੱਕ ਵਿੱਚ ਮੋਰਚਾ ਲਾਇਆ। ਪੰਜਾਬ ਨਾਲ ਪਾਣੀਆਂ ਦੇ ਸਮਝੌਤੇ ਵਿੱਚ ਅਕਾਲੀ ਦਲ ਦੀ ਭੂਮਿਕਾ ਉਦੋਂ ਸ਼ੱਕੀ ਹੁੰਦੀ ਹੈ ਜਦੋਂ ਸਰਦਾਰ ਬਾਦਲ ਨੇ ਦੇਵੀ ਲਾਲ ਦੀ ਸਰਕਾਰ ਕੋਲੋਂ ਸੌ ਕਰੋੜ ਰੁਪਇਆ ਲੈ ਕੇ ਮਿੱਤਰਤਾ ਪਾਲਦਿਆਂ ਪਾਣੀਆਂ ਦੀ ਲੁੱਟ ਦਾ ਰਾਹ ਖੋਹਲਤਾ। ਪਾਣੀਆਂ ਦੇ ਮੁੱਦੇ ‘ਤੇ ਜਦੋਂ ਸੁਪਰੀਮ ਕੋਰਟ ਦਾ ਫੈਸਲਾ ਆਇਆ ਤਾਂ ਬਾਦਲ ਸਰਕਾਰ ਨੇ ਸੌ ਕ੍ਰੋੜ ਵਾਪਸ ਕਰਨ ਦੀ ਡਰਾਮੇਬਾਜ਼ੀ ਕੀਤੀ। ਕੇਵਲ ਖਾਨਾ ਪੂਰਤੀ ਲਈ ਕਹਿ ਦਿੱਤਾ ਕਿ ਜਿਹਦੀ ਜਿਹਦੀ ਜ਼ਮੀਨ ਨਹਿਰ ਵਿੱਚ ਆਉਂਦੀ ਹੈ, ਉਹ ਆਪਣੇ ਕਬਜ਼ੇ ਵਿੱਚ ਕਰ ਲੈਣ। ਬਚਕਾਨਾ ਫੈਸਲੇ ਬਾਦਲ ਆਕਲੀ ਦਲ ਨੂੰ ਬਹੁਤ ਮਹਿੰਗੇ ਪਏ, ਨਾਲ ਹੀ ਲੋਕ ਇਹਨਾਂ ਦੀ ਅਸਲੀਅਤ ਵੀ ਜਾਣ ਗਏ। 15 ਸਾਲ ਅਕਾਲੀ ਦਲ ਬਾਦਲ ਨੇ ਪੰਜਾਬ ਵਿਚ ਰਾਜ ਕੀਤਾ। ਪੰਜ ਵਾਰ ਪੰਜਾਬ ਦਾ ਮੁੱਖ ਮੰਤ੍ਰੀ ਬਣਿਆ। ਇਹ ਸਾਬਤ ਕਰੋ ਕਿ ਪੰਜਾਬ ਦੇ ਭਲੇ ਦਾ ਕਿਹੜਾ ਕੰਮ ਕੀਤਾ ਜੇ। ਸਭ ਤੋਂ ਅਹਿਮ ਗੱਲ ਕਿ ਜਿੰਨ੍ਹਾਂ ਮੁੱਦਿਆਂ ‘ਤੇ ਲੋਕਾਂ ਕੋਲੋਂ ਵੋਟਾਂ ਮੰਗਦੇ ਰਹੇ, ਮੁੱਖ ਮੰਤ੍ਰੀ ਬਣਦਿਆਂ ਹੀ ਉਹ ਸਾਰੇ ਵਿਸਾਰ ਦਿੱਤੇ ਜਾਂਦੇ ਰਹੇ। ਪੰਜਾਬ ਦੀ ਰਾਜਧਾਨੀ ਚੰਡੀਗੜ੍ਹ ਨੂੰ ਪ੍ਰਾਪਤ ਕਰਨਾ, ਪੰਜਾਬੀ ਬੋਲਦੇ ਇਲਾਕਿਆਂ ਨੂੰ ਪੰਜਾਬ ਵਿਚ ਸ਼ਾਮਿਲ ਕਰਨਾ, ਦਰਿਆਈ ਪਾਣੀਆਂ ਸਬੰਧੀ ਇਨਸਾਫ਼ ਹਾਸਲ ਕਰਨ ਵਾਲੇ ਮੁੱਦੇ ਠੰਡੇ ਬਸਤੇ ਵਿਚ ਪਾ ਦਿੱਤੇ। ਅਕਾਲੀ ਦਲ ਬਾਦਲ ਆਪਣੇ ਆਪ ਨੂੰ ਕਿਰਸਾਨ ਹਤੈਸ਼ੀ ਦਸਦੇ ਰਹੇ ਹਨ ਪਰ ਇਹਨਾਂ ਪੰਦਰ੍ਹਾਂ ਸਾਲਾਂ ਵਿਚ ਕਣਕ ਝੋਨੇ ਦਾ ਬਦਲ ਨਹੀਂ ਪੈਦਾ ਕਰ ਸਕੇ। ਇਕ ਕਿਲੋ ਝੋਨਾ ਪੈਦਾ ਕਰਨ ਲਈ ਤਿੰਨ ਹਜ਼ਾਰਾਂ ਲੀਟਰ ਪਾਣੀ ਚਾਹੀਦਾ ਹੈ। ਪਰ ਅਕਾਲੀ ਦਲ ਬਾਦਲ ਪਰਵਾਰ ਦੇ ਮੋਹ ਦੀਆਂ ਤੰਦਾਂ ਵਿਚ ਫਸ ਗਿਆ। ਕੇਂਦਰ ਵਿਚ ਦਸ ਸਾਲ ਸਰਦਾਰ ਮਨਮੋਹਨ ਸਿੰਘ ਪ੍ਰਧਾਨ ਮੰਤਰੀ ਰਹੇ, ਉਦੋਂ ਅਕਾਲੀਆਂ ਦੇ ਕੇਂਦਰ ਨਾਲ ਚੰਗੇ ਸੰਬੰਧ ਸਨ, ਪਰ ਅਕਾਲੀਆਂ ਨੇ ਪੰਜਾਬ ਲਈ ਸ਼ਾਇਦ ਹੀ ਕੋਈ ਪੈਕਜ ਮੰਗਿਆ ਹੋਵੇ। ਹੋਰ ਤਰਾਸਦੀ ਕਿ ਪੰਜਾਬ ਦੇ ਕਾਂਗਰਸੀ ਆਗੂਆਂ ਨੇ ਵੀ ਪੰਜਾਬ ਲਈ ਕੋਈ ਪੈਕਜ਼ ਨਹੀਂ ਮੰਗਿਆ।

ਖੰਡੇ ਦੀ ਪਾਹੁਲ, ਨੀਲੀਆਂ ਦਸਤਾਰਾਂ ਤੇ ਹੱਥ ਵਿਚ ਕਿਰਪਾਨ ਰੱਖਣੀ ਅਕਾਲੀ ਦਲ ਛੱਡ ਗਿਆ। ਅਕਾਲੀ ਦਲ ਸਾਰਾ ਘੋਨ-ਮੋਨ ਹੋ ਗਿਆ ਹੈ। ਹਾਅ! “ਤੁਹਾਡਾ ਬੇੜਾ ਬਹਿਜੇ” ਤੁਸਾਂ ਤਾਂ ਆਪਣਿਆਂ ਹੱਥਾਂ ਵਿਚ ਮੌਲ਼ੀਆਂ ਬੰਨ੍ਹ ਕੇ ਮੱਥੇ ਤੇ ਤਿਲਕ ਵੀ ਲਗਾ ਲਏ। ਅੰਮ੍ਰਿਤਸਰ ਦੀ ਧਰਤੀ ਨੂੰ ਛੱਡ ਕੇ ਅਕਾਲੀ ਦਲ ਬਾਦਲ ਨੇ ਆਪਣਾ ਦਫਤਰ ਚੰਡੀਗੜ੍ਹ ਬਣਾ ਲਿਆ। ਢਾਡੀ ਪ੍ਰੰਪਰਾ ਦਾ ਤਿਆਗ ਕਰਦਿਆਂ ਫਿਲਮੀ ਠੁਮਕਿਆਂ ਨੂੰ ਪ੍ਰਧਾਨਤਾ ਦਿੱਤੀ। ਗੁਰਦੁਆਰਿਆਂ ਦੇ ਸਭਿਆਚਾਰ ਨੂੰ ਛੱਡ ਕੇ ਮਹਿੰਗੇ ਹੋਟਲਾਂ ਵਿਚ ਮੀਟਿੰਗਾਂ ਦਾ ਦੌਰ ਚਲਾ ਦਿੱਤਾ। ਬਿਨਾਂ ਸ਼ਰਤ ਵਾਜਪਾਈ ਨੂੰ ਹਮਾਇਤ ਦੇਣਾ ਅਕਾਲੀ ਦਲ ਨੇ ਆਪਣਾ ਬੇੜਾ ਆਪੇ ਗਰਕਣ ਵਿੱਚ ਕੋਈ ਕਸਰ ਨਹੀਂ ਛੱਡੀ। ਹੋਲੀ ਖੇਡਦਿਆਂ ਸਿਰ ਵਿੱਚ ਰੰਗ ਪਵਾਉਣਾ, ਤੀਹ ਸਾਧਾਂ ਨੂੰ ਸ਼੍ਰੋਮਣੀ ਕਮੇਟੀ ਦੀਆਂ ਟਿਕਟਾਂ ਦੇਣੀਆਂ, ਗੁਰੂ ਗ੍ਰੰਥ ਸਾਹਿਬ ਦੇ ਬਰਾਬਰ ਦਸਮ ਗ੍ਰੰਥ ਦਾ ਪ੍ਰਕਾਸ਼ ਕਰਨ ਵਾਲਿਆਂ ਨਾਲ ਸਾਂਝ ਰੱਖਣੀ, ਅਜਿਹੇ ਕਰਮਾਂ ਨਾਲ ਤੁਸਾਂ ਆਪਣੀਆਂ ਜੜ੍ਹਾਂ ਵਿਚ ਆਪੇ ਹੀ ਤੇਲ ਦੇ ਲਿਆ ਹੈ। ਤੁਸਾਂ ਕਿਹਾ ਸੀ ਬੇਅਦਬੀ ਕਰਨ ਵਾਲਿਆਂ ਦਾ ਕੱਖ ਨਾ ਰਹੇ, ਇੰਝ ਲਗਦਾ ਏ ਰੱਬ ਨੇ ਨੇੜੇ ਹੋ ਕੇ ਤੁਹਾਡੀ ਸੁਣ ਲਈ ਅਤੇ ਤੁਹਾਡਾ ਹੁਣ ਕੱਖ ਨਹੀਂ ਰਿਹਾ। ਸਿੱਖੀ ਰਵਾਇਤਾਂ ਨੂੰ ਮਿੱਟੀ ਵਿਚ ਮਿਲਾਉਂਦਿਆਂ ਸ਼ਿਵ ਲਿੰਗ ਤੇ ਦੁੱਧ ਚੜ੍ਹਾਉਣਾ, ਸ਼ਨੀ ਦੇਵਤੇ ਦੀ ਪੂਜਾ ਕਰਨਾ, ਮੱਥੇ ਵਿਚ ਤਿਲਕ ਲਗਾਉਣਾ, ਰਮਾਇਣ ਦੇ ਪਾਠ ਕਟਾਉਣੇ, ਸੰਪਟ ਪਾਠ ਕਰਾਉਣੇ ਅਕਾਲੀ ਦਲ ਬਾਦਲ ਨੇ ਇਸ ਸਾਰੇ ਅਨਮਤੀ ਕਰਮ ਕੀਤੇ। ਸਿੱਖ ਰਹਿਤ ਮਰਿਯਾਦਾ ਨੂੰ ਨਾ ਮੰਨਣ ਵਾਲੇ ਸਾਧਾਂ ਦੀ ਪੁਸ਼ਤ ਪਨਾਹੀ ਕੀਤੀ। ਸਨਾਤਨੀ ਸਾਧਾਂ ਨੂੰ ਖੁਸ਼ ਕਰਨ ਲਈ ਤੁਸਾਂ ਨਾਨਕਸ਼ਾਹੀ ਕੈਲੰਡਰ ਦਾ ਭੋਗ ਪਾਇਆ। ਗੁਰੂ ਗ੍ਰੰਥ ਸਾਹਿਬ ਦੇ ਫਲਸਫੇ ਤੇ ਸਿੱਖ ਰਹਿਤ ਮਰਿਯਾਦਾ ਤੋਂ ਸਿਧਾਂਤਕ ਤੌਰ ‘ਤੇ ਬਾਗੀ ਹੋਣ ਨਾਲ ਤੁਹਾਨੂੰ ਸਮੁੱਚੇ ਪੰਥ ਨੇ ਤੁਹਾਡੀ ਔਕਾਤ ਦਰਸਾ ਦਿੱਤੀ ਹੈ। ਵੋਟਾਂ ਲਈ ਪੰਥਕ ਮੁੱਦਿਆਂ ਨੂੰ ਤਿਆਗਿਆ ਪੰਥ ਨੇ ਤੁਹਾਨੂੰ ਤਿਆਗ ਦਿੱਤਾ। ਸਿੱਖ ਵਿਰੋਧੀ ਕਰਮ ਕਰਕੇ ਤੁਸਾਂ ਆਪਣਾ ਬੇੜਾ ਆਪੇ ਡੋਬ ਲਿਆ। ਜ਼ਰਾ ਇਕੱਲੇ ਬੈਠ ਕੇ ਸੋਚਿਓ ਪੰਥ ਨੇ ਤੁਹਾਡੇ ਲਈ ਕੀ ਕੁਝ ਨਹੀਂ ਕੀਤਾ? ਪੰਥ ਰਹੁ ਰੀਤਾਂ ਲਈ ਤੁਸਾਂ ਕੀ ਕੀਤਾ?