ਪੰਜਾਬੀਆਂ ਨੂੰ ਸੀਮਤ ਦਾਇਰੇ ਵਿਚ ਬੰਨ੍ਹ ਕੇ ਰੱਖਣ ਦੀ ਕੇਂਦਰ ਸਰਕਾਰ ਦੀ ਨੀਤੀ ਅੱਜ ਵੀ ਓਸੇ ਤਰ੍ਹਾਂ ਬਰਕਰਾਰ ਹੈ। ਜੇ ਕੇਂਦਰ ਦੀਆਂ ਪੰਜਾਬ ਪ੍ਰਤੀ ਮਾਰੂ ਨੀਤੀਆਂ ਚੱਲ ਰਹੀਆਂ ਹਨ ਪਰ ਪੰਜਾਬ ਦੇ ਕਿਸੇ ਨੇਤਾ ਵਿਚ ਇਖ਼ਲਾਕੀ ਤੌਰ ‘ਤੇ ਪੰਜਾਬ ਪ੍ਰਤੀ ਕੋਈ ਵਫ਼ਾਦਾਰੀ ਨਹੀਂ ਹੈ। ਚੋਣਾਂ ਆਉਂਦੀਆਂ ਨੇ ਸਿਆਸਤਦਾਨ ਚੀਕਾਂ ਮਾਰਦੇ ਹਨ ਕਿ ਅਸੀਂ ਪੰਜਾਬ ਨੂੰ ਅਮਰੀਕਾ ਕਨੇਡਾ ਬਣਾ ਦਿਆਂਗੇ। ਪੰਜਾਬ ਭਾਵੇਂ ਅਮਰੀਕਾ ਕਨੇਡਾ ਤਾਂ ਨਹੀਂ ਬਣਿਆਂ ਪਰ ਪੰਜਾਬ ਦੇ ਨੇਤਾਵਾਂ ਨੇ ਆਪਣਿਆਂ ਪਰਿਵਾਰਾਂ ਲਈ ਅਮਰੀਕਾ ਕੈਨੇਡਾ ਜ਼ਰੂਰ ਬਣਾ ਲਿਆ ਹੈ। ਇਨ੍ਹਾਂ ਨੇਤਾਵਾਂ ਨੇ ਸੱਤਾਂ ਸੱਤਾਂ ਪੀੜ੍ਹੀਆਂ ਦੀਆਂ ਰੋਟੀਆਂ ਇਕੱਠੀਆਂ ਕਰ ਲਈਆਂ ਹਨ। ਕੁਝ ਚੰਦ ਕੁ ਲੀਡਰ ਛੱਡ ਦਈਏ ਤਾਂ ਬਾਕੀ ਕਿਸੇ ਵੀ ਪੰਜਾਬੀ ਲੀਡਰ ਵਿਚ ਪੰਜਾਬ ਪ੍ਰਤੀ ਕੋਈ ਮੁਹੱਬਤ ਨਹੀਂ ਹੈ। ਜਿਸ ਲੀਡਰ ਦਾ ਦਾਅ ਲੱਗਿਆ ਹੈ ਉਸ ਨੇ ਹੀ ਪੰਜਾਬ ਨੂੰ ਨਿੰਬੂ ਵਾਂਗ ਨਚੋੜਿਆ ਹੈ। ਪੰਜਾਬ ਦੀ ਅਫ਼ਸਰਸ਼ਾਹੀ ਵੀ ਏਸੇ ਹਮਾਮ ਵਿਚ ਪੂਰੀ ਤਰ੍ਹਾਂ ਨੰਗੀ ਹੈ।

ਅਕਾਲੀਆਂ ਦੀ ਪੰਥਕ ਸਰਕਾਰ ਹੋਵੇ, ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਹੋਵੇ, ਸ਼ਾਤ ਬੈਠੀਆਂ ਸੰਗਤਾਂ ‘ਤੇ ਗੋਲੀ ਚਲਾਈ ਜਾਵੇ ਤੇ ਕਿਹਾ ਜਾਵੇ ਕਿ ਇਹ ਬੇ-ਅਦਬੀ ਵਿੱਚ ਪਾਕਿਸਤਾਨ ਦਾ ਹੱਥ ਹੈ। ਤੁਹਾਡੇ ਲਈ ਡੁੱਬ ਕੇ ਹੀ ਮਰਨ ਵਾਲੀ ਗੱਲ ਹੈ ਤੁਸੀਂ ਕਿਹੜੇ ਮੂੰਹ ਨਾਲ ਆਪਣੇ ਆਪ ਨੂੰ ਸਿੱਖਾਂ ਦੀ ਸਿਰਮੋਰ ਜੱਥੇਬੰਦੀ ਅਖਵਾਉਂਦੇ ਹੋ। ਵੋਟਾਂ ਲੈਣ ਲਈ ਅਕਾਲੀ ਦਲ ਨੂੰ ਸ਼ਹੀਦਾਂ ਦੀ ਜੱਥੇਬੰਦੀ ਆਖਣ ਲੱਗੇ ਭੋਰਾ ਸ਼ਰਮ ਮਹਿਸੂਸ ਨਹੀਂ ਕਰਦੇ। ਅਜੀਤ ਅਖ਼ਬਾਰ ਦੇ ਸੰਪਾਦਕ ਤੋਂ ਪੁੱਛਿਆ ਕਿ ਭਾਈ ਤੁਸੀਂ ਜੰਗੇ ਅਜ਼ਾਦੀ ਦੇ ਮੁਖੀ ਰਹੇ ਹੋ ਕੋਈ ਗੜਬੜ ਤਾਂ ਨਹੀਂ ਹੋਈ। ਬਸ ਫਿਰ ਕੀ ਸੀ ਸਾਰੀਆਂ ਰਾਜਨੀਤਿਕ ਪਾਰਟੀਆਂ ਦੇ ਮੁੱਖੀ ਮਸ਼ਹੂਰੀ ਲੈਣ ਲਈ ਅਜੀਤ ਅਖ਼ਬਾਰ ਦੇ ਦਫ਼ਤਰ ਪਹੁੰਚ ਗਏ। ਪੂਰਾ ਵਾਵੇਲਾ ਕੀਤਾ ਗਿਆ। ਕਿਤੇ ਕਿਸੇ ਦਾ ਵਿਆਹ ਹੋਵੇ ਤੁਸੀਂ ਸਾਰੇ ਇਕੱਠੇ ਹੀ ਰੋਟੀ ਛੱਕਦੇ ਹੋ। ਇਕ ਦੂਜੇ ਨੂੰ ਪਲੇਟਾਂ ਲਿਆ ਕੇ ਦਿੰਦੇ ਹੋ ਤੁਹਾਡੀਆਂ ਸਾਰੀਆਂ ਪਾਰਟੀਆਂ ਦੇ ਨੁਮਾਇੰਦਿਆਂ ਦੀਆਂ ਤਸਵੀਰਾਂ ਛੱਪਦੀਆਂ ਹਨ। ਕੀ ਤੁਹਾਨੂੰ ਹੁਣ ਪੰਜਾਬ ਦੇ ਮੁੱਦਿਆਂ ‘ਤੇ ਇਕੱਠੇ ਹੋਣ ਲਈ ਮੌਤ ਪੈਂਦੀ ਆ। ਜਿੰਨਾ ਘਟੀਆ ਪੱਧਰ ਰਾਜਨੀਤੀ ਵਿੱਚ ਹੁਣ ਆਇਆ ਸ਼ਾਇਦ ਹੀ ਪਿਛਲੇ 75 ਸਾਲਾਂ ਵਿਚ ਹੋਵੇ। ਸਵੇਰੇ ਸੁੱਤੇ ਉੱਠਦਿਆਂ ਹੀ ਇਕ ਦੂਜੇ ਨੂੰ ਘਟੀਆ ਤੋਂ ਘਟੀਆ ਮਿਹਣੇ ਮਾਰੇ ਰਹੇ ਹੋ। ਕਿਹਾ ਜਾਏ ਨੇਤਾ ਜਹਾਂ, ਅੱਛਾ ਵਹੀ ਸ਼ੁਮਾਰ, ਸਚ ਕਹ ਕਰ ਜੋ ਝੂਠ ਦੇਤਾ, ਹੈ ਗਲੇ ਉਤਾਰ।

ਭਗਵੰਤ ਸਿੰਘ ਮਾਨ ਦੀ ਸਰਕਾਰ ਨੂੰ ਅਸੀਂ ਸੁਝਾਅ ਦਿਆਂਗੇ ਕਿ ਪਿਛਲੇ 75 ਸਾਲਾਂ ਵਿਚ ਸਿਰਫ ਲਾਲੂ ਪ੍ਰਸਾਦ ਯਾਦਵ, ਓਮ ਪ੍ਰਕਾਸ਼ ਚੁਟਾਲਾ ਜਾਂ ਕੁਝ ਉਹਨਾਂ ਨੂੰ ਸਜਾ ਹੋਈ ਹੈ ਜਿਹੜਾ ਸਰਕਾਰ ਦੀ ਲੱਤ ਥੱਲਿਓਂ ਦੀ ਨਹੀਂ ਲੰਘਿਆ ਵਰਨਾ ਅੱਜ ਤੱਕ ਕਦੇ ਕਿਸੇ ਨੇਤਾ ਨੂੰ ਕਿਸੇ ਘੁਟਾਲੇ ਵਿਚ ਕੋਈ ਸਜ਼ਾ ਨਹੀਂ ਹੋਈ। ਕਾਨੂੰਨ ਦੀਆਂ ਚੋਰ ਮੋਰੀਆਂ ਰਾਹੀਂ ਸਿਆਸੀ ਲੋਕ ਸਦਾ ਬਚਦੇ ਹੀ ਰਹੇ ਹਨ। 1984 ਦਾ ਕਤਲੇਆਮ ਹੋਵੇ ਜਾਂ ਬੇਅਦਬੀ ਦਾ ਮੁਆਮਲਾ ਹੋਵੇ ਕੀ ਕਿਸੇ ਤੇ ਕੋਈ ਠੋਸ ਕਾਰਵਾਈ ਹੋਈ ਹੈ? ਪੰਜਾਬ ਦੇ ਸਿਆਸਤਦਾਨ ਬੌਧਿਕ ਕੰਗਾਲਤਾ ਦੀ ਸਿੱਖਰ ‘ਤੇ ਪਹੁੰਚੇ ਹੋਏ ਹਨ। ਪੰਜਾਬ ਦੇ ਦਰਿਆਵਾਂ ਦੇ ਪਾਣੀਆਂ ਦੀ ਮਾਲਕੀ ਦੇ ਹੱਕ ਗੁਆਂਢੀ ਰਾਜਾਂ ਤੋਂ ਪਾਣੀਆਂ ਦੀ ਕੀਮਤ ਵਸੂਲਣ ਲਈ ਪੰਜਾਬ ਵਿਧਾਨ ਸਭਾ ਵਲੋਂ ਸਰਬਸੰਮਤੀ ਨਾਲ ਪਾਸ ਕੀਤੇ ਕਾਨੂੰਨ ਤੇ ਮਤਿਆਂ ਦੀ ਪੈਰਵਾਈ ਕਰਨ ਦੀ ਥਾਂ ਆਪਸ ਵਿੱਚ ਝਾਟਿਓ-ਝਾਟੀ ਹੋਈ ਜਾਣ ਨੂੰ ਪੰਜਾਬ ਦੀ ਵਡਮੁੱਲੀ ਸੇਵਾ ਸਮਝੀ ਬੈਠੇ ਹਨ। ਇਹ ਬਿਲਕੁਲ ਠੀਕ ਹੈ ਕਿ ਪੰਜਾਬ ਦੇ ਅਕਾਲੀਏ ਤੇ ਕਾਂਗਰਸੀਏ ਕੇਂਦਰ ਵਲੋਂ ਬਾਲੀ ਅੱਗ ਵਿਚ ਹੱਥ ਸੇਕਦੇ ਰਹੇ ਤੇ ਆਪਣੀਆਂ ਸਰਕਾਰਾਂ ਬਣਾਉਂਦੇ ਰਹੇ। ਇਕ ਦੂਜੇ ‘ਤੇ ਕੇਸ ਕਰਦੇ ਰਹੇ ਤੇ ਉਹ ਕੇਸ ਵਾਪਸ ਵੀ ਲੈਂਦੇ ਰਹੇ। ਇਨ੍ਹਾਂ ਤੋਂ ਦੁਖੀ ਹੋ ਕੇ ਲੋਕਾਂ ਨੇ ਆਮ ਆਦਮੀ ਪਾਰਟੀ ਨੂੰ ਸਪੱਸ਼ਟ ਬਹੁਮਤ ਦੇ ਕੇ ਵਿਧਾਨ ਸਭਾ ਵਿਚ ਭੇਜਿਆ ਹੈ। ਹੁਣ ਇਨ੍ਹਾਂ ਦੀ ਵਾਰੀ ਹੈ ਕਿ ਸੂਬੇ ਲਈ ਕੁਝ ਕਰਕੇ ਦਿਖਾਇਆ ਜਾਏ। ਆਮ ਆਦਮੀ ਪਾਰਟੀ ਵੀ ਅਜੇ ਉਹੋ ਭਾਸ਼ਨ ਦੇ ਰਹੀ ਹੈ ਜਿਸ ਤਰ੍ਹਾਂ ਚੋਣ ਪ੍ਰਚਾਰ ਚੱਲ ਰਿਹਾ ਹੋਵੇ। ਇਨ੍ਹਾਂ ਨੂੰ ਦੋ ਕੰਮ ਕਰਨੇ ਚਾਹੀਦੇ ਇਕ ਤਾਂ ਜਿਹੜਾ ਕੁਝ ਪਹਿਲੀਆਂ ਸਰਕਾਰਾਂ ਜਾਂ ਉਨ੍ਹਾਂ ਦੇ ਮੰਤਰੀ ਘਪਲੇ ਕਰ ਗਏ ਉਹ ਨਸ਼ਰ ਕਰ ਦੇਣ, ਦੂਜਾ ਪੰਜਾਬ ਦੇ ਮੁੱਦਿਆਂ ਲਈ ਸਪੱਸ਼ਟ ਨੀਤੀ ਬਣਾਈ ਜਾਏ। ਜੇ ਤੁਸੀਂ ਕਹਿੰਦੇ ਸੀ ਬਾਦਲ ਢੀਂਡਸਾ ਦੀ ਫੋਟੋ ਨਹੀਂ ਹੋਣੀ ਚਾਹੀਦੀ ਹੁਣ ਤੁਹਾਡੀਆਂ ਦੇਖਣ ਨੂੰ ਮਿਲ ਰਹੀਆਂ ਹਨ ਫਿਰ ਫਰਕ ਕੀ ਹੈ। ਤੁਸੀ ਤਾਂ ਨਿਯੁਕਤੀ ਪੱਤਰਾਂ ਤੇ ਵੀ ਫੋਟੋ ਲਾ ਦਿੱਤੀ ਹੈ। ਸੱਤਰ ਸਾਲਾਂ ਤੋਂ ਲੜਾਈ ਚਲਦੀ ਆਈ ਏ, ਕੁਰਸੀ ਪਿੱਛੇ ਸਿਆਸਤ ਬਲਦੀ ਆਈ ਏ। ਅਤੇ ਅੰਮ੍ਰਿਤ ਦੇ ਵਿੱਚ ਜ਼ਹਿਰਾਂ ਜਿੱਦਾਂ, ਪਾਣੀ ਵਿੱਚ ਅੱਗਾਂ ਨੇ। ਜਿੱਧਰ ਦੇਖੋ ਸੱਜਣਾਂ ਦਾ ਹੈ, ਭੇਸ ਵਟਾਇਆ ਠੱਗਾਂ ਨੇ।